Gracia Delva fè yon gwo retou ak Mass Konpa atravè nouvo tit “Men kle a (vin pran l)”, ki sòti 31 jiyè 2025. Mizik sa a make yon moman enpòtan pou gwoup la, ak yon samplè ki soti nan ansyen hit “Kontwòl” nan albòm Do it Right gwoup Zenglen.
Nan nouvo pwodiksyon sa Gracia mete anpil limyè sou yon jèn gitaris 14 an, Lemondy Destany, alyas Ti Lemoine, ak eslogan “Ti Lemoine ou pran lari a bonè”, jèn adolesan sa parèt tankou tout gwo mizisyen (gitaris) nan yon solo gita, menm sou grafik kouvèti a nou rejwenn jèn rekri sa kap byen pase nan Mass Konpa.
Nan mizik Men kle a (vin pran l) lan, Gracia preche inite pou pouse konpa pi lwen, denonse polemik nan endistri mizik la, ak kritike kèk animatè ki ankouraje mouvman ki pa benefisye biznis la. Li di tou li te “ale ak kle a Ayiti” e li ap mande pou yo vin pran l nan men l, yon fason pou l afime pozisyon l kòm yon lidè nan konpa. Li voye yon kout chapo tou pou Mechanste, yon jèn atis ki disparèt nan kondisyon toumante, di li te “prete” kle a bay Mechanste, yon bèl jès respè.
Pou dosye Ti Lemoine nan Mass Konpa, Gracia te reponn mesye One Show Pam yo klè, li pap ankouraje jèn lan, fòk li al lekòl fòk li kontinye fòme tèt li. Li eksplike pou li se yon eksplwa paske misye sòti Kasolèy (nan yon zòn rekile nan Gonayiv), li tap difisil pou l pran frap li menm li pran nan biznis lan, men li pa bouke mete talan piti a an valè.
Mizik “Men kle a (vin pran l)” parèt sitou kòm yon refleksyon pwofon sou dezòd ak meli melo nan endistri mizik ayisyen an jodi a, pandan Gracia ap chèche mete konpa sou yon pi bon wout.
